Organisatie | Weststellingwerf |
---|---|
Organisatietype | Gemeente |
Officiële naam regeling | Rieglement H.J. Bergveld Pries |
Citeertitel | Rieglement H.J. Bergveld Pries |
Vastgesteld door | gemeenteraad |
Onderwerp | bestuur en recht |
Eigen onderwerp | Rieglement H.J. Bergveld Pries |
Geen.
Geen.
Datum inwerkingtreding | Terugwerkende kracht tot en met | Datum uitwerkingtreding | Betreft | Datum ondertekening Bron bekendmaking | Kenmerk voorstel |
---|---|---|---|---|---|
01-01-2009 | Nieuwe regeling | 12-01-2009 Stellingwerf + Griffioen 18-02-2009 | 2008-000412/r |
De taelpries is bestemd veur wark in et Stellingwarfs in de briedste zin. Et kan daorbi'j gaon om literair of taelkundig wark. Et hoeft niet per se om schreven tael te gaon, geluud- en/of beeldopnaemen kun ok veur de pries in anmarking kommen, as ok orgenisaosies die heur aktief inzetten veur (et behoold van) et Stellingwarfs.. Et wark moet een belangrieke betekenis veur de Stellingwarver tael hebben of had hebben. D'r is gien tiedstermien waorbinnen et wark verschenen wezen moet. De pries kan mar ien keer uutrikt wodden an dezelde persoon of orgenisaosie.
Onder Stellingwarfs wodt in dit riegelment verstaon: de tael die in Zuudoost-Frieslaand, Zuudwest-Drenthe en Noordwest-Overiessel van ooldsher leeft en deur taelkundigen as Stellingwarfs anduded wodt. Dat kan inholen dat ok dialekten die wat veer van de standerd-schrieftael of lieken te staon, aksepteerd wodden kunnen; bi'j twiefel nemt de jury een besluut, zoks, as 't meugelik is, naodat deskundigen raod geven hebben.
D'r wodt van uutgaon dat et te beoordielen wark in de standerd -schriefwieze staot (ok wel de Bergveld-spelling nuumd); ere spellings wo'n ok aksepteerd, mar dan moet veur dat gebruuk wel een dudelike reden an te wiezen wezen die de jury aksepteren kan, èn die spelling moet konsekwent wezen, zoks weer neffens et oordiel van de jury. Bi'j twiefel nemt de jury pas (as zoks meugelik is) nao overleg mit ien of meer deskundigen een besluut.
De pries die as uutrikt wodt is een penning mit daorop de anduding "H.J. Bergveld-pries". Butendat is d'r een geldbedrag van € 1.000,00 veur de prieswinner an verbunnen.
De pries wodt omstebeurten uutrikt deur de borgemeister van Oost-Stellingwarf en zien of heur kollega van West-Stellingwarf, of deur een deur heur an te wiezen bekende persoonlikhied uut de literaire wereld.
In de jury wo'n twie deskundigen keuzen deur de gemientebesturen van Oost- en West-Stellingwarf, op veurdracht van de warkgroep H.J. Bergveld-pries. As et even kan bin die deskundigen ofstudeerd in de Algemiene literetuurwetenschop, of in de Nederlaanse tael- en letterkunde; eers is et iene die ofstudeerd is in een richting die daor dichte tegen an ligt, of is et iene daor van anneumen wodden kan dat die deur eigen studie genoeg inzicht in de literetuur het. De dadde deskundige wodt op veurdracht van de warkgroep H.J. Bergveld-pries keuzen deur de Stichting Stellingwarver Schrieversronte. De dadde deskundige wodt niet allienig op grond van inzicht in literetuur, mar meer nog om zien of heur inzicht in et bruken van verzorgd Stellingwarfs anwezen. De orgenisatoren zorgen d'r veur, dat elke keer op zien minst ien lid van de jury vervongen wodt. De zittingstermien is uterlik achttien jaor. De onderlinge taekverdieling van de juryleden vaalt onder de eigen verantwoordelikhied van de jury.
De kosten die bi'j et gehiel maekt wodden, bin veur de gemientebesturen van Oost- en West-Stellingwarf. De dielnemers hebben gien recht op bepaolde onkostenvergoedings.
Veur vieftien oktober van et jaor veur de priesuutrikkinge het de warkgroep H.J. Bergveld-pries de jury bi'j mekeer brocht, neffens disse statuten.
Veur vieftien meert van et jaor van de priesuutrikkinge heurt de beoordeling klaor te wezen. De daegelikse besturen nemen dan as regel et veurstel van de jury over.
In de twiede helte van meie wodt de pries in een officiële bi'jienkomst in et gemientehuus van omstebeurten Oost- en West-Stellingwarf uutrikt. Daoromhenne en daornao wo'n de belangriekste zaeken van et jaor rond de H.J. Bergveld-pries deur de orgenisatoren in de publiciteit brocht. In et kot wodt angeven, hoe de jury tot zien besluut kommen is.
Drs. H. Oosterman, borgemeister van Oost-Stellingwarf.Drs. G. van Klaveren, borgemeister van West-Stellingwarf.Oosterwoolde/Wolvege, 2008